Les mots surlignés font l'objet d'une note
1Reçue à Grenoble ,le 10 janvier 1573
2Monsieur, je receuz le XVIIe du passé votre lettre du XIIIe et entendis bien au long
3ce que le secretaire de monsieur le mareschal de Dampville me dict touchant la
4lettre trouvée au prisonnier du Buys, et n’eusse failly d’en accuser plustost
5la reception sans l’incommodité du temps qui est si rigoureux de froidures,
6neiges et glaces que ledit sieur mareschal ne peult, pour encores, executer
7ce quil a si bien commencé et mesmes que le Rosne est prins et innavigable,
8qui est cause quil n’a si tost l’artillerie et munitions quil desiroit.
9Mais comme la sayson sera adoulcye il se mectra en campaigne pour attaquer
10quelques lieux, ainsi qu’a faict du cousté de Thoulouse monsieur l’admiral qui a
11prins Malauze et Belleperche qui est sur la rivière de Garonne, et est allé
12assieger Terride lequel lon dict, que le sieur de Savignac luy mectra en main
13à l’amyable proveu quil luy soit faict rayson par monsieur le mareschal de
14la foy sur ce quil y pretend, ce quil a desià offert, et parce moyen, je cuyde
15que ladite place soit desià remise soubz l’obeyssance du roy, ne vous pouvant
16pour asture dire aultre chose de ce cartier là ny d’ailliers, fors que tout
17maintenant vient d’arriver de la court ung advocat catholicque de Nysmes
18qui a demeuré vingt jours en chemin, lequel m’a rappourté que le duc d’Albe
19a prins par force la ville de Gueldes et mis à feu et à sang tout ce qui a
20esté trouvé dedans, en revanche de la perte des hommes qu’il a perdus au siège ;
21disant de plus que Monseigneur, frère du roy, avoit eu nouvelles que ceulx de
22Poloigne l’avoyent esleu pour leur roy, et quil avoit faict donner une abbaye
23à celluy qui luy avoit appourté ceste advis, confirmant aussi que monsieur le
24baron de La Garde, avoit prins deux navires chargez de bledz pour La
25Rochelle. De quoy je vous ay bien voleu advertir, encores que vous en
26puyssiez estre d’ailleurs, comme je feray de toutes aultres choses qui viendront
27à celluy qui vous recommande ce porteur bien estroictement à ce que votre
28playsir soit de luy impartir votre faveur et auctorité en ce qu’il en aura
29[5 v°] besoing pour lexpedition d’un procès quil a en la court de parlement de
30Daulfiné. Il est chanoyne en mon eglise Sainct Estienne de Thoulouse et
31personnaige qui merite beaucoup, qui m’occasionne de le vous recommander
32de rechef comme je fays et moy mesmes de bon cueur à votre bonne
33grace, en priant Dieu de vous donner,
34monsieur, heureuse et longue vye, en toute perfection de santé.
35D’Avignon, le IIIe de janvier 1573.
36Votre bon et affectionné à vous aymer et
37honorer comme frère. G. Card. Darmagnac